Gleðileg jól!

Í Damascus

Eins og mér þykir nú aðventan skemmtilegur tími þá leitar hugurinn oft til baka, þar sem undanfarin ár hef ég verið á flakki á þessum tíma árs.

Stekkjarstaur kom fyrstur...

Þar sem ég beið í röð við kassann í Melabúðinni í gær þá heyrði ég kostulegt samtal mæðgna sem voru á undan mér í röðinni. Dóttirin var á að giska 4-5 ára gömul og var að segja mömmu sinni frá jólasveinunum, sem sumir hverjir eru jú haldnir hinum undarlegustu blætum. Það er því ekki að undra að sú litla hafi ruglast aðeins, þegar hún útskýrði að Stekkjarstaur sem kæmi fyrstur og væri elstur þeirra bræðra "reyndi að komast inn í fjárhúsin og drekka blóðið úr kindunum"...

Kannski leikarar séu farnir að accessoriz-a íslensku jólasveinabúningana með vampýrutönnum?!

Fyrsta færsla eftir laaaangt hlé

Ég fór til Frakklands í október í nokkra daga, svo til Osló í nokkra daga (ekki amaleg vinna þetta) og sneri mér síðan að próflestri. Nú eru prófin búin og mín bara að vinna og ekki með nein aukaverkefni í bið, svo að næst á dagskrá er jólaföndur og notalegheit í rólegheitum við kertaljós. Þar sem ég hélt jólin hátíðleg í Jórdaníu í fyrra og í Argentínu árið þar áður finnst mér afar gaman að þvælast milli bókabúða og kaffihúsa og njóta aðventunnar hér heima í ár.

Og nú hef ég svo sannarlega tíma til að taka á móti gestum, svo að kandídatar í svoleiðis eru vinsamlega beðnir að bjóða sig fram.